വാല്‍സിംഗ്ഹാം തീര്‍ത്ഥാടന പ്രോമോ റിലീസ് ചെയ്തു; മരിയോത്സവത്തിനു ഇനി മൂന്നു നാള്‍::Syro Malabar News Updates വാല്‍സിംഗ്ഹാം തീര്‍ത്ഥാടന പ്രോമോ റിലീസ് ചെയ്തു; മരിയോത്സവത്തിനു ഇനി മൂന്നു നാള്‍
18-July,2019

വാല്‍സിംഗ്ഹാം: ഗ്രേറ്റ് ബ്രിട്ടന്‍ സീറോ മലബാര്‍ രൂപതയുടെ നേതൃത്വത്തില്‍ നടത്തിപ്പോരുന്ന യുകെ യിലെ ഏറ്റവും വലിയ മരിയന്‍ ആഘോഷമായ വാല്‍സിംഗ്ഹാം തീര്‍ത്ഥാടനത്തിനാമുഖമായി നിര്‍മിച്ച പ്രോമോ റിലീസ് ചെയ്തു. പ്രോമോയിലൂടെ അനുഗ്രഹ പെരുമഴ സദാ പൊഴിയുന്ന, കരുണയുടെയും സാന്ത്വനത്തിന്റെയും അനുഭവമേകുന്ന മാതൃ പുണ്യകേന്ദ്രമായ വാല്‍സിംഗ്ഹാമിലേക്ക് രൂപതയുടെ അഭിവന്ദ്യ അധ്യക്ഷന്‍ ജോസഫ് സ്രാമ്പിക്കല്‍ പിതാവ് വ്യക്തിപരമായി ഓരോരുത്തരെയും, യു കെ യിലെ മുഴുവന്‍ മാതൃഭക്തരെ ഒന്നായും, ക്ഷണിക്കുവാനും, ഇംഗ്ലണ്ടിലെ 'നസ്രേത്ത്' എന്ന മാതൃ പുണ്യ സന്നിധേയത്തെ പ്രഘോഷിക്കുവാനും ഈ അവസരം ഉപയോഗിക്കുകയാണ്.
 
യുകെയിലെ എല്ലാ മാതൃ ഭക്തരുടെയും ആവേശപൂര്‍വമായ കാത്തിരിപ്പിന് ഇനി മൂന്നുനാള്‍ മാത്രം ബാക്കിയിരിക്കെ, തീര്‍ത്ഥാടന വിജയത്തിനുള്ള പ്രാര്‍ത്ഥനാമഞ്ജരിയുമായി ഫാ.തോമസ് പാറക്കണ്ടത്തില്‍, ഫാ.ജോസ് അന്ത്യാംകുളം, ട്രസ്റ്റിമാരായ ടോമി പാറക്കല്‍, നിതാ ഷാജി എന്നിവരുടെ നേതൃത്വത്തില്‍ ഈ തീര്‍ത്ഥാടനത്തിന്റെ സംഘാടകരും, പ്രസുദേന്തിമാരുമായ ഈസ്റ്റ് ആംഗ്ലിയായിലെ പ്രമുഖ സീറോ മലബാര്‍ കമ്യുണിറ്റിയായ കോള്‍ചെസ്റ്റര്‍, വന്നെത്തുന്ന ആയിരക്കണക്കിന് തീര്‍ത്ഥാടകര്‍ക്ക് വേണ്ട എല്ലാ ക്രമീകരണങ്ങള്‍ക്കുമുള്ള അവസാനവട്ട മിനുക്കു പണികളിലാണ്.
 
ജൂലൈ 20 നു ശനിയാഴ്ച രാവിലെ ഒമ്പതിനു ദിവ്യകാരുണ്യ ആരാധനയോടെ തീര്‍ത്ഥാടന ശുശ്രുഷകള്‍ ആരംഭിക്കും. പതിനൊന്നിനു പ്രശസ്ത ധ്യാന ഗുരു ഫാ. ജോര്‍ജ് പനക്കല്‍ മരിയന്‍ പ്രഘോഷണം നടത്തും. രാവിലെ പത്തു മുതല്‍ കുട്ടികളെ മാതൃ സന്നിധിയില്‍ സമര്‍പ്പിക്കുന്നതിനുള്ള അവസരം ഒരുക്കിയിട്ടുണ്ട്.
 
ഉച്ചയ്ക്ക് പന്ത്രണ്ടോടെ മരിയന്‍ പ്രഘോഷണത്തിനു ശേഷം ഭക്ഷണത്തിനായുള്ള ഇടവേളയാണ് ക്രമീകരിച്ചിരിക്കുന്നത്. നാടന്‍ ഭക്ഷണങ്ങള്‍ മിതമായ നിരക്കില്‍ തീര്‍ത്ഥാടകര്‍ക്ക് ലഭ്യമാക്കുവാനുള്ള കലവറ തയാറായി എന്ന് തീര്‍ത്ഥാടക കമ്മിറ്റി അറിയിച്ചു.
 
12:45 നു മരിയ ഭക്തി ഗീതങ്ങളാല്‍ മുഖരിതമായ അന്തരീക്ഷത്തില്‍ പരിശുദ്ധ ജപമാലയും സമര്‍പ്പിച്ചുകൊണ്ട്,വര്‍ണ്ണാഭമായ മുത്തുക്കുടകളുടെയും, വാദ്യ മേളങ്ങളുടെയും അകമ്പടിയോടെ മാതൃ സ്‌നേഹത്തിന്റെ പ്രഘോഷണവുമായി തീര്‍ത്ഥാടനം ആരംഭിക്കും.
 
തീര്‍ത്ഥാടനം സ്ലിപ്പര്‍ ചാപ്പലില്‍ എത്തിച്ചേര്‍ന്ന ശേഷം ഉച്ചകഴിഞ്ഞു 2:45 നു കൊണ്ടാടുന്ന ആഘോഷമായ തീര്‍ത്ഥാടന തിരുന്നാള്‍ സമൂഹ ബലിയില്‍ മാര്‍ സ്രാമ്പിക്കല്‍ പിതാവ് മുഖ്യ കാര്‍മ്മികത്വം വഹിക്കും. സീറോ മലബാര്‍ മോണ്‍സിഞ്ഞോര്‍മാരും, യുകെയുടെ നാനാ ഭാഗത്തു നിന്നും എത്തുന്ന മറ്റു വൈദികരും സഹ കാര്‍മ്മികരായിരിക്കും.
 
പരിശുദ്ധ മാതാവിന്റെ മദ്ധ്യസ്ഥതയില്‍ അനുഗ്രഹങ്ങളും, ഉദ്ദിഷ്ടകാര്യ സാധ്യതയും നേടുവാന്‍ മലയാളികള്‍ക്കായി കിട്ടിയരിക്കുന്ന അനുഗ്രഹ ധന്യ വേദിയിലേക്ക് കോള്‍ചെസ്റ്റര്‍ കമ്മ്യുനിട്ടിഏവരെയും സസ്‌നേഹം ക്ഷണിച്ചു കൊള്ളുന്നു.
 
തീര്‍ത്ഥാടനവുമായി ബന്ധപ്പെട്ട കൂടുതല്‍ വിവരങ്ങള്‍ക്ക് ട്രസ്റ്റിമാരായ ടോമി പാറക്കല്‍ 07883010329, നിതാ ഷാജി 07443042946 എന്നിവരുമായി ബന്ധപ്പെടുവാന്‍ താല്പര്യപ്പെടുന്നു.
 
THE BASILICA OF OUR LADY OF WALSINGHAM, HOUGHTON ST.GILES
NORFOLK, LITTLE WALSINGHAM, NR22 6AL 
 
Walsingham Pilgrimage promo link
https://www.youtube.com/watch?v=FCOVqjmKKG0&list=PLUXpnZ2amBzw8dfKGqRvHJsxS_tArWx42

Source: deepika.com

Attachments




Back to Top

Never miss an update from Syro-Malabar Church