Daily Readings for Wednesday May 22,2019

March 2020
S M T W T F S
1234567
891011121314
15161718192021
22232425262728
293031    
<< Feb   Apr > >>

Reading 3, കൊളോ 3: 5-11 : പുതിയ മനുഷ്യനെ ധരിക്കുവിൻ

അതുകൊണ്ട്, നിങ്ങളില്‍ ഭൗമികമായിട്ടുള്ളതെല്ലാം - അസന്മാര്‍ഗികത, അശുദ്ധി, ആസക്തി, ദുര്‍വിചാരങ്ങള്‍, വിഗ്രഹാരാധനതന്നെയായ ദ്രവ്യാസക്തി ഇവയെല്ലാം - നശിപ്പിക്കുവിന്‍. അനുസരണമില്ലാത്തവരുടെമേല്‍ ഇവ നിമിത്തം ദൈവത്തിന്‍റെ ക്രോധം വന്നുചേരുന്നു. നിങ്ങളും ഒരിക്കല്‍ അവയില്‍ ചരിക്കുകയും ജീവിക്കുകയും ചെയ്തിരുന്നു. ഇപ്പോള്‍ അവയെല്ലാം ദൂരെയെറിയുവിന്‍: അമര്‍ഷം, ക്രോധം, ദുഷ്ടത, ദൈവദൂഷണം, അധരങ്ങളില്‍ നിന്നുള്ള അശുദ്ധ വാക്കുകള്‍. പരസ്പരം കള്ളം പറയരുത്. പഴയ മനുഷ്യനെ അവന്‍റെ ചെയ്തികളോടെ ഉരിഞ്ഞു മാറ്റുവിന്‍. സമ്പൂര്‍ണജ്ഞാനംകൊണ്ട് സ്രഷ്ടാവിന്‍റെ പ്രതിരൂപത്തിനനുസൃതം നവീകരിക്കപ്പെടുന്ന പുതിയ മനുഷ്യനെ ധരിക്കുവിന്‍. ഇവിടെ ഗ്രീക്കുകാരനെന്നോ യഹൂദനെന്നോ പരിച്ഛേദിതനെന്നോ അപരിച്ഛേദിതനെന്നോ അപരിഷ്കൃതനെന്നോ സ്കീഥിയനെന്നോ അടിമയെന്നോ സ്വതന്ത്രനെന്നോ വ്യത്യാസമില്ല. പിന്നെയോ, മിശിഹാ എല്ലാമാണ്, എല്ലാവരിലുമാണ്.


Gospel, യോഹ 3: 1-8 : ജലത്താലും ആത്മാവിനാലും വീണ്ടും ജനനം

ഫരിസേയരില്‍ നിക്കൊദേമോസ് എന്നുപേരുള്ള ഒരു യഹൂദപ്രമാണിയുണ്ടായിരുന്നു. അവന്‍ രാത്രി ഈശോയുടെ അടുത്തുവന്നു പറഞ്ഞു: റബ്ബീ, അങ്ങ് ദൈവത്തില്‍നിന്നു വന്ന ഒരു ഗുരുവാണെന്നു ഞങ്ങള്‍ അറിയുന്നു. ദൈവം കൂടെയില്ലെങ്കില്‍ ഒരുവനും അങ്ങു ചെയ്യുന്ന ഈ അടയാളങ്ങള്‍ പ്രവര്‍ത്തിക്കാന്‍ കഴിയുകയില്ല. ഈശോ അവനോടു പറഞ്ഞു: സത്യം സത്യമായി ഞാന്‍ നിന്നോടു പറയുന്നു, വീണ്ടും ജനിക്കുന്നില്ലെങ്കില്‍ ഒരുവന് ദൈവരാജ്യം കാണാന്‍ കഴിയുകയില്ല. നിക്കൊദേമോസ് അവനോടു ചോദിച്ചു: പ്രായമായ ഒരു മനുഷ്യന് എങ്ങനെ ജനിക്കാന്‍ സാധിക്കും? അമ്മയുടെ ഉദരത്തില്‍ വീണ്ടും പ്രവേശിച്ച് അവനു ജനിക്കാന്‍ കഴിയുമോ? ഈശോ പ്രതിവചിച്ചു: സത്യം സത്യമായി ഞാന്‍ നിന്നോടു പറയുന്നു, ജലത്താലും ആത്മാവാലും ജനിക്കുന്നില്ലെങ്കില്‍ ഒരുവനും ദൈവരാജ്യത്തില്‍ പ്രവേശിക്കുക സാധ്യമല്ല. മാംസത്തില്‍നിന്നു ജനിക്കുന്നതു മാംസമാണ്; ആത്മാവില്‍നിന്നു ജനിക്കുന്നത് ആത്മാവും. നിങ്ങള്‍ വീണ്ടും ജനിക്കണം എന്നു ഞാന്‍ പറഞ്ഞതു കൊണ്ട് നീ വിസ്മയിക്കേണ്ടാ. കാറ്റ് അതിനിഷ്ടമുള്ളിടത്തേക്കു വീശുന്നു; അതിന്‍റെ ശബ്ദം നീ കേള്‍ക്കുന്നു. എന്നാല്‍, അത് എവിടെനിന്നു വരുന്നെന്നോ എവിടേക്കു പോകുന്നെന്നോ നീ അറിയുന്നില്ല. ഇതു പോലെയാണ് ആത്മാവില്‍നിന്നു ജനിക്കുന്ന ഏതു വ്യക്തിയും.


Back to Top

Never miss an update from Syro-Malabar Church